වර්ග කිලෝමීටර් 98.8ක් වූ මහර ප්‍රාදේශිය සභා බල ප්‍රදේශයේ ජනතාවගේ සුඛ විහරණය උදෙසා සුව සේවා, පොදු මංමාවත් විථි ආලෝකකරණය, ප්‍රජා සංවර්ධනය, පොදු උපයෝගී සේවාවන් මහජනතාවගේ සහභාගීත්වයෙන්, පරිසර හිතකාම් වන පරිදි හා සම්මත අණ පනත් නීති රෙගුලාසිවලට අනුකූලව ඉටු කළයුතුය. සීමිත සම්පත් උපරිම ඵලදායිතාවයකින් උපයෝජනයට ගනිමින් ජනතාවගේ සුඛ විහරණය උදෙසා වාර්ෂිකව බදු ගෙවන ජනතාවට විශාල මෙහෙයක් සිදු කරනු ලබයි.

සිව් කෙලෙසුන් නසා අරහත්වයට පත් මහරහතන් වහන්සේගේ පුණ්‍ය පාදස්පර්ශයෙන් පවිත්‍ර වූ ක්ෂේම භූමියක් වශයෙන් ද මහර බලප්‍රදේශයේ ඇති ඓතිහාසික පින්බිමක් ලෙස පිළිකුත්තු හැඳින්විය හැකිය. අක්කර 200ක පමණ භූමි භාගයක කටාරම් කෙටූ හා කටාරම් නොකෙටූ ගල් ලෙන් වලින් සමන්විත පිළිකුත්තු රාජ මහා විහාරය මූලික කර සංවර්ධනය වූ පුරාවිද්‍යාත්මක උරුම රාශියකින් සමන්විත ඓතිහාසික වනගත සෙනසුනකි. බස්නාහිර පළාතේ පිහිටි විශාලතම ගල්ලෙන් සංකීර්ණය වශයෙන් ද මෙය ඉතිහාසගත වන්නේ ඒ නිසාය. ඓතිහාසික වැදගත්කමකින් යුතු ස්ථාන කිහිපයක් ලෙස වලගම්බා රජමහා විහාරය, මාලිගාතැන්න විවේක සේනාසනය, වෑබඩ පුරාණ රජමහා විහාරය, අනාගාරික මහමෙව්නා අසපුව, වරපලාන ටැම්පිට පිළිමගෙය දැක්වීය හැකිය. දනවුකන්ද ප්‍රසිද්ධ භාවනා මධ්‍යස්ථානයකි. ඉසිගිලිකන්ද දර්ශනීය කඳු මුදුනක පිහිටි පන්සලකි. යෝගාශ්‍රමයක්ද සහිතය.

ඉතාමත් මනරම් ස්වභාව සෞන්දර්යයෙන් හෙබි ‌ෙළුතිහාසික දෙස් විදෙස් ආකර්ෂණයෙන් සමන්විතවූ මහර බල ප්‍රදේශය සීග්‍රයෙන් සංවර්ධනය කරා ගමන් කරන මහර ප්‍රාදේශීය සභා බල ප්‍රදේශයේ ජනතාවගේ පොදු පහසුකම් වැඩිදියුණු කිරීම සහ ඔවුන්ගේ ජීවන තත්ත්වය නගා සිටුවීම මගේ ප්‍රධාන අරමුණයි. බලප්‍රදේශයේ ජනතාවගේ අවශ්‍යතාවයන් මනාව හදුනාගත් මා මහජනතාව වෙනුවෙන් නිරන්තරයෙන් කටයුතු කරමි.

මහර ප්‍රාදේශීය සභාවේ විවිධ අංශයන් තුලින් ඉටු කරන ලද කාර්යභාරයත්, සභාව සතුව පවතින සම්පත් ආරක්ෂා කරමින්, ඵලදායීව උපයෝජනය කිරීමට සමගාමීව ප්‍රශස්ත මුල්‍ය විනයක් පවත්වාගෙන යාම තුලින් විනිවිදභාවයක් ඇති කර උපරිම කාර්ය සාධනයකින් යුක්තව ප්‍රදේශයේ ජනතාවට කාර්යක්ෂම හා ඵලදායී සේවාවක් සැපයීමට මම අපේක්ෂා කරමි.

මහර ප්‍රාදේශීය සභාව අඛණ්ඩ සංවර්ධනයක් කරා ගෙන යාමේ මෙහෙවර, මෙහෙවීම සදහා මා කැපවීමෙන් කටයුතු කරන අතර එම කටයුතු සාක්ෂාත් කර ගැනීම සදහා ඔබ සැමගේ සහයෝගය නොඅඩුව ලැබෙනු ඇතැයි මම විශ්වාස කරමි.

මහර ප්‍රාදේශීය සභාව පළාත් පාලන ආයතයන් අතර විශිෂ්ට මහජන සබැදි කාර්යක්සම සේවාවක් සපයන ආයතනයක් බවට පත් කිරීම මාගේ මුලික අභිප්ප්‍රායයි.

මහර බලප්‍රදේශයේ ජනතාවටත් අප හා සම්බන්ධ වීමට අපේක්ෂා කරන ආයතන හා පුරවැසියන්ට මහර ප්‍රාදේශීය සභා වෙබ් අඩවියට පිවිසෙන ලෙසට මා ඉතා ගෞවරයෙන් ආරාධනා කර සිටිමි.

එල්.ඒ මංජුලා සමන්ති,
ලේකම් හා ප්‍රාදේශිය සභාවේ බලතල,
කාර්ය, කර්තව්‍ය ක්‍රියාත්මක කිරීමේ නිලධාරී,
මහර ප්‍රාදේශිය සභාව.
2024-01-02